Rom 5 | MHL | STEP | Aria i yiena Maneka Yeesus Krais opora wiar opamkun Mua Maneka-ke pina marew yia naeya o wameiya kema kuisow ikemik.

Romans 5

Mua Maneka i pina marew yia naiya

1 Aria i yiena Maneka Yeesus Krais opora wiar opamkun Mua Maneka-ke pina marew yia naeya o wameiya kema kuisow ikemik. 2 Yeesus Krais ona era yia wuomak, feenap, i opora wiar opamkun Mua Maneka-ke yia kemalem-ikaeya i aakisa eliw akena ikaimik. Naeya wiimar Mua Maneka wameiya ikok unum maneka aawiyen. I nain naep kemelimik. 3 Ne me nain muutiw, fain pun, i aakisa sirirowa sira-sira aawimik, nain feenap amisaremik, i sirirowa aawimik nain-pa kekaniyen, naap maimik. Naapeya kemelap maiyen, “I eliw yoowa aawiyen.” 4 Ne naap kekanep ikok akimowa unowa eliw nomakiyen. Naeya i maa kema-pa yiar tuupam-ikaiya nain makena urufiyen. 5 Mua Maneka ona Ewar Eliwa sesekeya yiamiya ikok Mua Maneka yia kemaliya nain kema yia fookeya amisaremik. Naapeya i maa kema-pa yiar tuupam-ikaiya nain makena yiar imenareya urufiyen.

6 Ni fain amisareka, i pina onaiya ikok yiena pina iirarowa era marew. Ne naap ikemkun Krais-ke i yia naep umok. Mua Maneka iiriw umowa wuomak nain aakisa epa nain wiar pepek ereya o umok. 7 Aria i miiw sira feenap, pina mua wia ifakimowa naiwkin mua oko-ke epa me wiar aawep umimik, weetak akena. Ne mua eliwa pun naap, mua oko-ke epa wiar aawep me umimik-yon. Ne mua eliw akena nain, makena, mua oko-ke maikuan-yon, “Yos-ke eliw epa wiar aawep uminen,” naap mainon. 8 Nain i pina-pa ikemkun Krais i pina muuta nain umok. Mua Maneka manek akena yia kookalek nain nan ariman yia ofakowak. 9 O umemi aka oreya Mua Maneka-ke i pina yiar iirarep i unowa ni pina marew yia naek. Aria i iiriw Mua Maneka iiwuarem-ikemkun ona Muuka-ke umep yia aaweya kema epaskun ikemik. Naapeya maken akena, Mua Maneka bagiaw wiimar miiw mua wia ofakowowa nain i ona teeria me yia ofakowinon, iiwawun iiwkak. Ne Krais umep ikok iikireya i kekanowa nan anane eliwa ikaiyen. 11 Ne me nain muutiw, fain pun, yiena Maneka Yeesus Krais eena i yia aaweya Mua Maneka wameiya kema epaskun ikemik nain kema suuwap manek akena kemelimik.

Adam-ke umowa wuak, ne Yeesus-ke anane ikowa wuak

12 Ne aria Mua Maneka mokomokoka mua onak nain, Adam eena Mua Maneka opora wiar fienap pina onak. Naeya pina onowa nain nan miiwa-pa imenarek. Ne pina onowa muuta nain miiwa-pa ikowa Mua Maneka-ke umowa wuak. Naapeya miiw unowa mua unowiya umimik, moram i unowiya pina onimik. 13 Moses sira me wuowa ikua nain miiw mua pina naap onam-ikemik. Ne aakisa pun onimik. Makena Moses sira me wuekak-na i pina onamkun Mua Maneka-ke pina kuisow kuisow nain me yia tuunekak. 14 Nain iiriw Adam-pa onoma wuap ekapep Moses epa-pa miiw mua umem-ikemik. Makena wi pina onamik nain me Adam pina onak sira nain-keriw, weetak, nain wi pina onap umem-ikemik. Adam eena mua murarep imenarowa nain kukusimok.

15 Nain Adam pina onak nan maa samora yiar imenarek, ne Yeesus Krais sira onak nan maa eliw akena yiar imenarek. Feenap, mua kuisow nain pina onak nan i miiw mua unowa wakiemik, ne umowa nan imenareya mua unowiya umimik. Ne Krais umok nan maa sira oko yiar imenarek, feenap, Mua Maneka-ke manek akena yia kemalek. Ne mua unowa yia aawep yia saliwam-ikainon. 16 Mua kuisow nain pina oneya mua unowiya pina-pa korinemik. Naeya Mua Maneka-ke eliw yia samorinon. Ne mua unowa pina sira-sira onimik. Nain Mua Maneka-ke yia samorowa nain Yeesus Krais umowa-pa yia saliwami ni pina marew yia naek. Naapeya mua kuisow pina onak nain maa samora imenarek, ne aria Mua Maneka Krais-pa maa yia onomak nain, maa eliw akena yiar imenarek. 17 Ne oko pun feenap, makena, mua kuisow pina-pa umowa-ke epa aawok. Ne maa fain-ke maken akena, i Yeesus Krais opora opamkun Mua Maneka manek akena yia kemalep yia saliwami i pina marew yia naeya kakeniw ikemik. Naeya i o wameiya ikok wiimar owow enuma-pa maa muutitik urufam-ikaiyen.

18 Aria naapeya kiiriw maiyem, mua kuisow-ke pina oneya pina nan Mua Maneka i mua unowiya umep epa samora ikiwowa yia wuomak. Ne mua oko-ke Mua Maneka opora ookap umeya os-ke mua unowiya pina marew wia naeya o wameiya ikok eliw ikaikuan. 19 Neemi mua kuisow Mua Maneka opora wiar fieneya mua unowa pina onaiya ikemik. Ne mua oko-ke Mua Maneka opora miimap ookak nan Mua Maneka-ke mua unowa wi pina marew, kaken eliwa-ke wia nainon.

20 Ne aria Mua Maneka Moses maakeya sira wuomakek nain-ke i pina onimik nain ariman yiar wueya yiam maimik, i pina unowa. I mua pina unowa onimik, nain Mua Maneka yia kemalow sira manek akena nain-ke i pina onimik nain yiar nomakek. 21 Naapeya makena, i pina onimik muuta nain umowa-ke yia ifemakep ikua. Nain aakisa Mua Maneka ona yia kemalep yia saliwowiw ikaiya nain-ke miiw maneka epa aawok. Naeya yiena Maneka Yeesus Krais umok muuta nain i pina marew yia naeya i anane o wameiya eliwa ikaimik.